जनमतले नै स्थायी सरकार बनायौ ।
अब हामी जेसुकै गरौँ, भर्सेला परौँ
तिमी जनताहरु आफ्नो थान्कोमा बस्नु ।
जान्ने पल्टेर हामीलाई सिकाई नटोपल्नु ।
हाम्रा मन्त्रीले भाषण गर्दा,
ताली गड्गडाउनु
हुन्छ त हुन्छ, सडक ठप्प,
हाम्रो सवारीमा तिमी गाली नवर्साउनु ।
दिनको दुई तिन जनाको बलात्कार हुँदैमा
किन दुखोस् हामी दुई तिहाई वाला सरकारको टाउको?
जनताले घुँडासनमा चाकरी गरुन्, भन्ने हाम्रो अभिष्ट,
निर्मलाको लागि न्याय माग्नेलाई देख्र्छौँ
षड्यन्त्रकारी र समृद्धि विरुद्धका दुष्ट ।
हामी मग्न छौ, नयाँ युगको उत्सवमा
युगान्तकारी परिवर्तनको नायक हामी
छाउन चाह्यौँ घरघर र गल्लीगल्लीमा ।
बाहिर झलमल छ,
स्.. स्.. स्.. अन्तष्करणमा हाम्रो सरकार अलमलमा छ ।
हरदिन हररात,
त्यो निर्मला खेद्छे, हामीलाई सुनसान गल्लीमा ।
हामीले आफ्नो मन बहलाउन
पोलमा, पत्रिकामा पर्चा टाँस्यौ
तिमीहरु अट्टहास हाँस्यौ,
हाम्रो तस्बीरको ठाउँमा
निर्मलाको तस्बीर साट्यौ ।
हामी जसको नाम सुन्न चाहन्नौँ,
जसको आकृति हेर्न चाहन्नौँ
जोसँग सम्बन्धीत समाचार देख्न चाहन्नौँ
जसको भुतले आतंकीत छौँ
किन तिमीहरु जोडजोडले उसकै नाम जप्छौ?
मन बहलाउने प्रयासमा हामी रहँदा
जब तिमीहरु निर्मलाको तस्बीर टाली हिँड्छौँ,
हामी रिसले बहुलाउँछौ,
हामी आत्तीन्छौँ, बहकिन्छौँ,
त्यसैले त पोष्टर च्यात्दै,
बुट बजार्न प्रहरीलाई आदेश दिन्छौँ ।
#JusticeForNirmala
#RageAgainstRape
No comments:
Post a Comment